India, Burma Kaladan Project, Pianhlim A Herh: Covo Himtu

June 11, 2013 

Global Chin News

BANGKOK, Thailand – India ‘Look East Policy’ in a chuakmi Burma sin a bawmhnak in, Chin State, Arakhine State le Mizoram State pehtlaihnak tlanglam le tilam sernak Kaladan Project hi a pianghlimmi le pawngkam khuasami hrangah a ṭhahnemmi si a hau tiah covo humhimtu nih nihin Press Confrence ah report an chim.

Southeast Asia ram ah India nih ram chawletnak le ramkhel cungcuan (influence) tuahnak “Look East Policy” ai ngeihmi in, Burma sinah bawmhnak a pek. Chin State, Paletwa khua le Arakan State, Sittwe khua in Mizoram State, Zorinpui khua ah tlanglam le tilam in pehtlainak sul le lam ser lio a si. Tilam caah Kaladan (Bawinu) tiva ah sangphawnglawng dinhnak le umkalnak lam ser lio a si; Kaladan Multi-Modal Transit Transport Project ti a si i, $ 214 dih in kum 2015 ah rian lim dingin ruah a si.

Chin Human Rights Organization, Arakan Rivers Network le Zo Indigenous Forum (Mizoram State) nih Kaladan Project rian hmun ah dothlatnak (research) an va tuah. Nihin June 11 ah Bangkok ah Press Conference an tuah i, Kaladan Project hi a pianghlimmi (transparent) le pawngkam khuasami caah a santlaimi a si a hau tiah report “One cannot step into the same river twice: making the Kaladan Project people-centred” an khawmhmi an chim.

“Pawngkam khuasa lothlo pawl le chawkawl thilchuah pawl caah lamṭha, innṭha a herh ko i, (project nih) chawleh miaknak ṭha a chuahpi khawh men ko nain, hmailei ah an vawlei ram chuhnak, inn le lo in ṭhawldawinak, pawcawm kawlhawlnak an ngeihmi hrawhpiaknak le ralkap tampi chiahnak a chuak sual hnga maw” tiah report nih a ti.

“Pawngkam minung nih Burma ram hunchonak pipuam biakhiahnak ah an i tel ve awk hrimhrim a si. Kaladan Project rian hma, tampi a kal hlanah, pawngkam thingram, mibu khuasaknak le ngandamnak kongah a chiat/ ṭhat chekhlaita cikcek dinng a si” tiah Twan Zaw, Executive Director of Arakan Rivers Network (nihin Press Conference Speaker) nih a ti.

“Kaladan Project rian hi pawngkam mibu zawnruahnak um loin, ṭuanchuah a si ahcun, India le Burma karlak ah pehtlaihnak ṭha nakin buainak tu a chuahter deuh te lai” tiah a ti rih.

Dothlatnak report an tuahmi nih hin, a chiatlei kap lawng a hmu lo i, a ṭhatnaklei kap zong a hmuhchih ve.

Kaladan Project hmun kiangah khuasami nuai (m) 1.2 nih an i ṭhathnempi khawhnak lam a um i, cutite cun, nuhrin covo buarpiak loin, kalter a si i, pawngkam khuasami sinah a dikningte in pehtlaih le pheo lo a herhnak kha a hmuh.

Asinain, pawngkam khuasa mibu namnehnak le nuhrin covo buarpiaknak tuah in a um cang – Mizoram State ah dawhcahte in liampalnak pe loin, an vawlei ram chuh an si, an inn le an lo in penchuah an si; Arakan State ah rianṭuan chormi ciocio duhdanhnak le pupa rothih umnak hmunhma hrawhpiaknak an tong tiah research an va tuahmi nih a hmuh.

Zo Indigenous Forum Director C. Lalremruata (Press Conference Speaker) nih, “Mizoram State, project hmuhma i khuasami nih Kaladan Project hi chawleh kawlhawlnak a chuahpitu hunchonak caansau a nguhmi siseh, pawngkam khuasaknak hrawk hlah seh, ti an duh. India lei le Burma lei um pawngkam miphun nih an pupa raohtakmi vawlei ram he pehtlai in, hi project rian ṭuan awk biakhiahnak ah an i tel hrimhrim ding a si. Kaladan Project caah an vawlei ram chuhmi cungah liampal (compensation) dawhcahte in pek awk hrimhrim an si” tiah a ti.

“Chin State, Paletwa area ah khuasa (Chinmi) sinah an hmunhma ah mawṭaw lampi cawh a sinak kong thawngthanh a um lo. Zeihmanh an hngalh lo cang ahcun, (Kaladan) project nih hin a ṭhathnem kho hna lai maw, asiloah, sunghzatlaknak tu hoi a pek sual hna hnga maw?” tiah Salai Za Uk Ling, CHRO Program Director (Press Conference Speaker ) nih a ti.

“Mah hi project nih hin, pawngkam khuasa community santlai lo bik a santlaihter hna awk a si. An sinah tuah a herhmi theihpianhlimternak, public consultation, an i telmoihnak le ṭuanvo cheuhnak a um lo ahcun/ tiang, Kaladan Project hi pehzulh rih loin, baangbatterta ding a si” tiah a ti rih.

http://www.globalchinnews.org/articles/theihtlei/kaladan-project.html

We have 31 guests and no members online